ਮੁੰਬਈ 'ਚ ਪਾਣੀ ਦੇ ਵਧਦੇ ਸੰਕਟ ਦੇ ਵਿਚਕਾਰ ਆਮ ਲੋਕਾਂ ਦੀਆਂ ਮੁਸ਼ਕਿਲਾਂ ਵੀ ਵਧਣ ਵਾਲੀਆਂ ਹਨ। ਦਰਅਸਲ, ਬ੍ਰਿਹਨਮੁੰਬਈ ਨਗਰ ਨਿਗਮ (ਬੀਐਮਸੀ) ਨੇ ਸ਼ਹਿਰ ਵਿੱਚ ਪੰਜ ਫੀਸਦੀ ਪਾਣੀ ਦੀ ਕਟੌਤੀ ਦਾ ਐਲਾਨ ਕੀਤਾ ਹੈ। ਇਹ ਹੁਕਮ ਸ਼ਹਿਰ ਵਿੱਚ 30 ਮਈ ਤੋਂ ਲਾਗੂ ਹੋਣਗੇ। ਅਜਿਹਾ ਇਸ ਲਈ ਹੈ ਕਿਉਂਕਿ ਮੁੰਬਈ ਨੂੰ ਪਾਣੀ ਦੀ ਸਪਲਾਈ ਕਰਨ ਵਾਲੇ ਜਲ ਭੰਡਾਰਾਂ 'ਚ ਵਰਤੋਂ ਯੋਗ ਪਾਣੀ ਦਾ ਸਿਰਫ 10 ਫੀਸਦੀ ਬਚਿਆ ਹੈ।

ਨਗਰ ਨਿਗਮ ਦਾ ਕਹਿਣਾ ਹੈ ਕਿ ਸ਼ਹਿਰ ਵਿੱਚ ਪਾਣੀ ਦੀ ਇਹ ਕਟੌਤੀ 5 ਜੂਨ ਤੋਂ 10 ਫੀਸਦੀ ਤੱਕ ਹੋਵੇਗੀ। ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਪਾਣੀ ਨੂੰ ਲੰਬੇ ਸਮੇਂ ਤੱਕ ਸਟੋਰ ਕੀਤਾ ਜਾਵੇ। ਇਸ ਤਰ੍ਹਾਂ ਦੀ ਕਟੌਤੀ ਸਿਰਫ ਮੁੰਬਈ ਵਿੱਚ ਹੀ ਨਹੀਂ ਸਗੋਂ ਠਾਣੇ ਨਗਰ ਨਿਗਮ ਅਤੇ ਭਿਵੰਡੀ ਨਿਜ਼ਾਮਪੁਰ ਨਗਰ ਨਿਗਮ ਵਿੱਚ ਵੀ ਜਾਰੀ ਰਹੇਗੀ। 25 ਮਈ ਨੂੰ ਜਾਰੀ ਰਿਪੋਰਟ ਮੁਤਾਬਕ ਮੁੰਬਈ ਨੂੰ ਪਾਣੀ ਸਪਲਾਈ ਕਰਨ ਵਾਲੇ ਜਲ ਭੰਡਾਰਾਂ ਵਿੱਚ ਸਿਰਫ਼ 1,40,202 ਮਿਲੀਅਨ ਲੀਟਰ ਪਾਣੀ ਬਚਿਆ ਹੈ। ਇਹ ਸ਼ਹਿਰ ਨੂੰ ਹਰ ਸਾਲ ਸਪਲਾਈ ਕੀਤੇ ਜਾਂਦੇ 14,47,364 ਮਿਲੀਅਨ ਲੀਟਰ ਪਾਣੀ ਦਾ ਮਹਿਜ਼ 9.69 ਫੀਸਦੀ ਹੈ।

ਇਹ ਕਦਮ ਨਗਰ ਨਿਗਮ ਦੇ ਪ੍ਰਧਾਨ ਭੂਸ਼ਣ ਗਗਰਾਨੀ ਦੇ ਉਸ ਬਿਆਨ ਤੋਂ ਬਾਅਦ ਚੁੱਕਿਆ ਗਿਆ ਹੈ, ਜਿਸ ਵਿੱਚ ਉਨ੍ਹਾਂ ਕਿਹਾ ਸੀ ਕਿ ਸ਼ਹਿਰ ਵਿੱਚ ਪਾਣੀ ਦਾ ਭਰਪੂਰ ਭੰਡਾਰ ਹੈ। ਨਗਰ ਨਿਗਮ ਦਾ ਕਹਿਣਾ ਹੈ ਕਿ ਪਾਣੀ ਦੇ ਭੰਡਾਰ 'ਤੇ ਲਗਾਤਾਰ ਨਜ਼ਰ ਰੱਖੀ ਜਾ ਰਹੀ ਹੈ। ਇਸ ਵਿੱਚ ਅੱਗੇ ਕਿਹਾ ਗਿਆ ਹੈ ਕਿ ਮੁੰਬਈ ਵਿੱਚ ਪਾਣੀ ਦੀ ਕਟੌਤੀ ਉਦੋਂ ਤੱਕ ਜਾਰੀ ਰਹੇਗੀ ਜਦੋਂ ਤੱਕ ਸ਼ਹਿਰ ਵਿੱਚ ਲੋੜੀਂਦੀ ਬਾਰਿਸ਼ ਨਹੀਂ ਹੋ ਜਾਂਦੀ। ਇਸ ਦੇ ਨਾਲ ਹੀ ਨਗਰ ਨਿਗਮ ਨੇ ਸ਼ਹਿਰ ਦੇ ਲੋਕਾਂ ਨੂੰ ਪਾਣੀ ਦੀ ਵਰਤੋਂ ਸਾਵਧਾਨੀ ਨਾਲ ਕਰਨ ਦੀ ਅਪੀਲ ਕੀਤੀ ਹੈ।