by vikramsehajpal
ਸਿਡਨੀ (ਐਨ.ਆਰ.ਆਈ. ਮੀਡਿਆ) : ਮੇਜ਼ਬਾਨ ਆਸਟ੍ਰੇਲਿਆਈ ਟੀਮ ਸੱਟਾਂ ਤੋਂ ਪਰੇਸ਼ਾਨ ਹੈ ਤੇ ਅਜਿਹੇ ਸਮੇਂ ਵਿਰਾਟ ਦੀ ਫ਼ੌਜ ਅੱਜ (ਐਤਵਾਰ) ਨੂੰ ਸਿਡਨੀ ਕ੍ਰਿਕਟ ਗਰਾਊਂਡ 'ਚ ਹੋਣ ਵਾਲੇ ਦੂਜੇ ਟੀ-20 ਵਿਚ ਉਸ ਨੂੰ ਹਾਰ ਦਾ ਇਕ ਹੋਰ ਜ਼ਖ਼ਮ ਦੇ ਕੇ ਤਿੰਨ ਮੈਚਾਂ ਦੀ ਸੀਰੀਜ਼ ਨੂੰ 2-0 ਨਾਲ ਆਪਣੇ ਨਾਂ ਕਰਨਾ ਚਾਹੇਗੀ।
ਹਰਫ਼ਨਮੌਲਾ ਰਵਿੰਦਰ ਜਡੇਜਾ ਦੀ ਗ਼ੈਰਮੌਜੂਦਗੀ ਦੇ ਬਾਵਜੂਦ ਭਾਰਤ ਦਾ ਪਲੜਾ ਭਾਰੀ ਦਿਖਾਈ ਦੇ ਰਿਹਾ ਹੈ। ਟੈਸਟ ਸੀਰੀਜ਼ ਤੋਂ ਪਹਿਲਾਂ ਟੀ-20 ਸੀਰੀਜ਼ ਜਿੱਤਣ ਨਾਲ ਭਾਰਤੀ ਟੀਮ ਦਾ ਮਨੋਬਲ ਵਧੇਗਾ।
ਕੈਨਬਰਾ ਵਿਚ ਤੀਜਾ ਵਨ ਡੇ ਤੇ ਪਹਿਲਾ ਟੀ-20 ਜਿੱਤਣ ਤੋਂ ਬਾਅਦ ਹੁਣ ਭਾਰਤੀ ਟੀਮ ਐੱਸਸੀਜੀ 'ਤੇ ਮੁੜੀ ਹੈ ਜਿੱਥੇ ਉਸ ਨੂੰ ਆਸਟ੍ਰੇਲੀਆ ਨੇ ਪਹਿਲੇ ਦੋ ਵਨ ਡੇ ਵਿਚ ਹਰਾ ਕੇ ਸੀਰੀਜ਼ ਜਿੱਤੀ ਸੀ। ਪਹਿਲੇ ਟੀ-20 ਵਿਚ ਜਡੇਜਾ ਦੇ ਸਿਰ 'ਚ ਸੱਟ ਲੱਗਣ ਤੋਂ ਬਾਅਦ 'ਕੰਕਸ਼ਨ' ਬਦਲ ਵਜੋਂ ਆਏ ਯੁਜਵਿੰਦਰ ਚਹਿਲ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕਰਦੇ ਹੋਏ ਤਿੰਨ ਵਿਕਟਾਂ ਲਈਆਂ ਸਨ।
