NIA ਨੇ ਸ਼ੁੱਕਰਵਾਰ ਨੂੰ ਬੈਂਗਲੁਰੂ ਦੇ ਰਾਮੇਸ਼ਵਰਮ ਕੈਫੇ ਬਲਾਸਟ ਮਾਮਲੇ 'ਚ ਕੋਲਕਾਤਾ ਤੋਂ ਦੋ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਨ੍ਹਾਂ ਦੇ ਨਾਂ ਅਬਦੁਲ ਮਤੀਨ ਤਾਹਾ ਅਤੇ ਮੁਸਾਵੀਰ ਹੁਸੈਨ ਸ਼ਾਜਿਬ ਹਨ। ਐਨਆਈਏ ਮੁਤਾਬਕ 2 ਮਾਰਚ ਨੂੰ ਸ਼ਾਜਿਬ ਨੇ ਕੈਫੇ ਵਿੱਚ ਆਈਈਡੀ ਰੱਖੀ ਸੀ, ਜਦੋਂ ਕਿ ਤਾਹਾ ਨੇ ਪੂਰੀ ਯੋਜਨਾ ਤਿਆਰ ਕੀਤੀ ਸੀ।

ਬੈਂਗਲੁਰੂ 'ਚ ਰਾਮੇਸ਼ਵਰਮ ਕੈਫੇ ਧਮਾਕੇ ਦੀ ਜਾਂਚ ਕਰ ਰਹੀ NIA ਨੇ 5 ਅਪ੍ਰੈਲ ਨੂੰ ਕਿਹਾ ਸੀ ਕਿ ਮਾਮਲੇ 'ਚ ਮੁੱਖ ਅਤੇ ਸਹਿ-ਦੋਸ਼ੀ ਦੀ ਪਛਾਣ ਕਰ ਲਈ ਗਈ ਹੈ। ਮੁਸਾਵੀਰ ਹੁਸੈਨ ਸ਼ਾਜਿਬ ਮੁੱਖ ਦੋਸ਼ੀ ਅਤੇ ਅਬਦੁਲ ਮਤੀਨ ਤਾਹਾ ਸਹਿ-ਦੋਸ਼ੀ ਹਨ। ਇਹ ਮੁਸਾਵੀਰ ਸੀ ਜੋ ਕੈਫੇ ਵਿੱਚ ਵਿਸਫੋਟਕ ਲੈ ਗਿਆ ਸੀ। ਦੋਵੇਂ ਸ਼ਿਵਮੋਗਾ ਜ਼ਿਲ੍ਹੇ ਦੇ ਤੀਰਥਹੱਲੀ ਦੇ ਰਹਿਣ ਵਾਲੇ ਹਨ।

ਐਨਆਈਏ ਨੇ ਦੋਵਾਂ ਦੀ ਭਾਲ ਵਿੱਚ ਕਰਨਾਟਕ, ਤਾਮਿਲਨਾਡੂ ਅਤੇ ਯੂਪੀ ਵਿੱਚ 18 ਟਿਕਾਣਿਆਂ ਉੱਤੇ ਛਾਪੇਮਾਰੀ ਕੀਤੀ ਸੀ। ਦੋਵਾਂ 'ਤੇ 29 ਮਾਰਚ ਤੋਂ 10 ਲੱਖ ਰੁਪਏ ਦੇ ਇਨਾਮ ਦਾ ਐਲਾਨ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਜਾਂਚ ਏਜੰਸੀ ਨੇ ਧਮਾਕੇ ਦੇ ਮਾਮਲੇ 'ਚ ਭਾਜਪਾ ਵਰਕਰ ਸਾਈ ਪ੍ਰਸਾਦ ਨੂੰ ਵੀ ਹਿਰਾਸਤ 'ਚ ਲਿਆ ਹੈ। ਐਨਆਈਏ ਦਾ ਕਹਿਣਾ ਹੈ ਕਿ ਕੈਫੇ ਧਮਾਕੇ ਦੇ ਮੁਲਜ਼ਮਾਂ ਨਾਲ ਸਾਈ ਦੇ ਸਬੰਧ ਹਨ।

ਇਸ ਤੋਂ ਪਹਿਲਾਂ ਜਾਂਚ ਏਜੰਸੀ ਨੇ 23 ਮਾਰਚ ਨੂੰ ਦੋ ਸ਼ੱਕੀਆਂ ਦੀ ਪਛਾਣ ਕੀਤੀ ਸੀ। ਫਰਾਰ ਮੁਲਜ਼ਮ ਤਾਮਿਲਨਾਡੂ ਦੇ ਪੁਲਸ ਇੰਸਪੈਕਟਰ ਕੇ. ਵਿਲਸਨ ਕਤਲ ਕੇਸ ਵਿੱਚ ਲੋੜੀਂਦਾ ਸੀ ਅਤੇ ਮੁੱਖ ਸ਼ੱਕੀ ਦੇ ਨਾਲ ਚੇਨਈ ਵਿੱਚ ਰਹਿ ਰਿਹਾ ਸੀ। ਐਨਆਈਏ ਮੁਤਾਬਕ ਸ਼ਾਜੀਬ ਅਤੇ ਤਾਹਾ ਦੋਵੇਂ ਆਈਐਸਆਈਐਸ ਮਾਡਿਊਲ ਦਾ ਹਿੱਸਾ ਹਨ। ਇਸ ਦੀ ਪੁਸ਼ਟੀ ਪਹਿਲਾਂ ਗ੍ਰਿਫਤਾਰ ਕੀਤੇ ਗਏ ਮਾਡਿਊਲ ਦੇ ਮੈਂਬਰਾਂ ਨੇ ਵੀ ਕੀਤੀ ਸੀ।