by mediateam
ਓਂਟਾਰੀਓ ਡੈਸਕ (ਵਿਕਰਮ ਸਹਿਜਪਾਲ) : ਕੈਨੇਡਾ ਵਿਖੇ ਸਿੰਗਲ ਵਾਹਨ ਹਾਦਸੇ ਦੌਰਾਨ ਹਰਿਆਣਾ ਦੇ ਕੈਥਲ ਨਾਲ ਸਬੰਧਤ ਸਿੱਖ ਨੌਜਵਾਨ ਮਲਿਕ ਸਿੰਘ ਦੀ ਮੌਤ ਦੀ ਦੁੱਖਦਾਈ ਖ਼ਬਰ ਹੈ। ਉਹ ਆਪਣੇ ਸਾਥੀਆਂ ਨਾਲ ਕਿਸੇ ਕੰਮ ਦੇ ਸਿਲਸਿਲੇ 'ਚ ਜਾ ਰਿਹਾ ਸੀ ਕਿ ਵਾਹਨ ਹਾਦਸੇ ਦੌਰਾਨ ਉਸ ਦੀ ਮੌਤ ਹੋ ਗਈ। ਇਹ ਸੜਕ ਹਾਦਸਾ ਬਰੈਂਪਟਨ ਦੇ ਨਾਲ ਲਗਦੇ ਸ਼ਹਿਰ ਕੈਲੇਡਨ ਵਿਖੇ ਵਾਪਰਿਆ। 19 ਸਾਲਾਂ ਦਾ ਮਲਿਕ ਸਿੰਘ 10 ਮਹੀਨੇ ਪਹਿਲਾਂ ਹੀ ਸਟੱਡੀ ਵੀਜ਼ਾ 'ਤੇ ਕੈਨੇਡਾ ਪੜਾਈ ਕਰਨ ਆਇਆ ਸੀ, ਜੋ ਹਰਿਆਣਾ ਦੇ ਕੈਥਲ ਨਾਲ ਸਬੰਧ ਰੱਖਦਾ ਹੈ।
ਮਲਿਕ ਸਿੰਘ ਦੇ ਕੈਥਲ 'ਚ ਰਹਿੰਦੇ ਪਿਤਾ ਅਪਾਹਜ ਹਨ ਤੇ ਨਾ ਹੀ ਉਨਾਂ ਕੋਲ ਕੋਈ ਹੋਰ ਵਿੱਤੀ ਸਾਧਨ ਹੈ। ਆਰਥਿਕ ਪੱਖੋਂ ਘਰ ਦੀ ਹਾਲਤ ਕਾਫੀ ਖਰਾਬ ਹੈ। ਮਲਿਕ ਸਿੰਘ ਦੇ ਮਾਪੇ ਚਾਹੁੰਦੇ ਹਨ ਕਿ ਉਨਾਂ ਦੇ ਪੁੱਤਰ ਦੀ ਲਾਸ਼ ਭਾਰਤ ਭੇਜੀ ਜਾਵੇ ਜਿਸ ਲਈ ਮਲਿਕ ਸਿੰਘ ਦੇ ਦੋਸਤ ਕੈਨੇਡਾ ਵਿਚ ਫੰਡ ਇਕੱਠਾ ਕਰਨ 'ਚ ਜੁਟੇ ਹੋਏ ਹਨ। ਮਲਿਕ ਸਿੰਘ ਦੇ ਦੋਸਤਾਂ ਨੇ ਲੋਕਾਂ ਨੂੰ ਵੀ ਅਪੀਲ ਕੀਤੀ ਹੈ ਕਿ ਉਹ ਵੀ ਵੱਧ ਤੋਂ ਵੱਧ ਫੰਡ ਦੇਣ ਤਾਂ ਜੋ ਮਲਿਕ ਸਿੰਘ ਦੀ ਲਾਸ਼ ਨੂੰ ਭਾਰਤ ਭੇਜਣ ਦਾ ਪ੍ਰਬੰਧ ਕੀਤਾ ਜਾ ਸਕੇ।
