ਦੇਵਾਸ (ਰਾਘਵ) : ਮੱਧ ਪ੍ਰਦੇਸ਼ ਦੇ ਦੇਵਾਸ ਤੋਂ ਇਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਫਰੀਜ਼ਰ 'ਚੋਂ ਇਕ ਔਰਤ ਦੀ ਲਾਸ਼ ਮਿਲੀ। ਔਰਤ ਦਾ ਕਤਲ ਕਰੀਬ 10 ਮਹੀਨੇ ਪਹਿਲਾਂ ਹੋਇਆ ਸੀ। ਮਾਮਲਾ ਸਾਹਮਣੇ ਆਉਂਦੇ ਹੀ ਪੁਲਿਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਇਹ ਘਟਨਾ ਦੇਵਾਸ ਬਾਈਪਾਸ ਸਥਿਤ ਵਰਿੰਦਾਵਨ ਧਾਮ ਕਾਲੋਨੀ ਵਿੱਚ ਵਾਪਰੀ। ਜਾਣਕਾਰੀ ਮੁਤਾਬਕ ਔਰਤ ਅਤੇ ਦੋਸ਼ੀ ਪਿਛਲੇ 5 ਸਾਲਾਂ ਤੋਂ ਲਿਵ-ਇਨ ਰਿਲੇਸ਼ਨਸ਼ਿਪ 'ਚ ਰਹਿ ਰਹੇ ਸਨ। ਔਰਤ ਉਸ 'ਤੇ ਵਿਆਹ ਲਈ ਦਬਾਅ ਪਾ ਰਹੀ ਸੀ, ਜਿਸ ਕਾਰਨ ਦੋਸ਼ੀ ਨੇ ਆਪਣੇ ਦੋਸਤ ਨਾਲ ਮਿਲ ਕੇ ਔਰਤ ਦਾ ਕਤਲ ਕਰ ਦਿੱਤਾ। ਫਿਰ ਉਸ ਨੇ ਲਾਸ਼ ਨੂੰ ਫਰੀਜ਼ਰ ਵਿਚ ਬੰਦ ਕਰ ਦਿੱਤਾ ਅਤੇ ਉਥੋਂ ਭੱਜ ਗਿਆ। ਔਰਤ ਦੀ ਪਛਾਣ ਪਿੰਕੀ ਉਰਫ ਪ੍ਰਤਿਭਾ ਪ੍ਰਜਾਪਤੀ ਵਜੋਂ ਹੋਈ ਹੈ। ਉਹ ਜੂਨ 2023 ਤੋਂ ਇੰਦੌਰ 'ਚ ਧੀਰੇਂਦਰ ਸ਼੍ਰੀਵਾਸਤਵ ਦੇ ਘਰ ਕਿਰਾਏ 'ਤੇ ਰਹਿ ਰਹੀ ਸੀ।

ਪਿਛਲੇ ਸਾਲ ਜੂਨ 'ਚ ਦੋਸ਼ੀ ਸੰਜੇ ਨੇ ਘਰ ਖਾਲੀ ਕਰ ਦਿੱਤਾ ਸੀ ਪਰ ਮਾਸਟਰ ਬੈੱਡਰੂਮ ਅਤੇ ਸਟੱਡੀ ਰੂਮ ਦਾ ਤਾਲਾ ਨਹੀਂ ਖੋਲ੍ਹਿਆ ਸੀ। ਉਹ ਇਨ੍ਹਾਂ ਕਮਰਿਆਂ ਵਿੱਚ ਆਪਣਾ ਸਮਾਨ ਛੱਡ ਗਿਆ ਸੀ। ਇਸ ਤੋਂ ਬਾਅਦ ਮਕਾਨ ਮਾਲਕ ਨੇ ਮਕਾਨ ਕਿਸੇ ਹੋਰ ਨੂੰ ਕਿਰਾਏ 'ਤੇ ਦੇ ਦਿੱਤਾ ਪਰ ਸੰਜੇ ਕਾਫੀ ਦੇਰ ਤੱਕ ਸਾਮਾਨ ਲੈਣ ਨਹੀਂ ਆਇਆ। ਫਿਰ ਮਕਾਨ ਮਾਲਕ ਨੇ ਕਿਰਾਏਦਾਰ ਬਲਵੀਰ ਸਿੰਘ ਨੂੰ ਤਾਲਾ ਤੋੜ ਕੇ ਸਾਮਾਨ ਬਾਹਰ ਕੱਢਣ ਲਈ ਕਿਹਾ। ਵੀਰਵਾਰ ਨੂੰ ਜਦੋਂ ਬਲਵੀਰ ਨੇ ਕਮਰਿਆਂ ਦੇ ਤਾਲੇ ਤੋੜੇ ਤਾਂ ਉਸ ਨੇ ਫਰਿੱਜ ਦੇਖਿਆ। ਉਹ ਸਵਿੱਚ ਆਨ ਸੀ, ਜਿਸ ਨੂੰ ਬਲਵੀਰ ਨੇ ਬੰਦ ਕਰ ਦਿੱਤਾ। ਸ਼ੁੱਕਰਵਾਰ ਸਵੇਰੇ ਘਰ 'ਚੋਂ ਤੇਜ਼ ਬਦਬੂ ਆਉਣ ਲੱਗੀ, ਜਿਸ ਤੋਂ ਬਾਅਦ ਬਲਵੀਰ ਨੇ ਪੁਲਸ ਅਤੇ ਮਕਾਨ ਮਾਲਕ ਨੂੰ ਸੂਚਨਾ ਦਿੱਤੀ। ਪੁਲਸ ਨੇ ਫਰੀਜ਼ਰ ਖੋਲ੍ਹਿਆ ਤਾਂ ਅੰਦਰ ਔਰਤ ਦੀ ਲਾਸ਼ ਮਿਲੀ। ਇਸ ਤੋਂ ਬਾਅਦ ਪੁਲਿਸ ਨੂੰ ਸੰਜੇ ਪਾਟੀਦਾਰ 'ਤੇ ਕਤਲ ਦਾ ਸ਼ੱਕ ਹੋਇਆ।

ਐਸਪੀ ਪੁਨੀਤ ਗਹਿਲੋਦ ਨੇ ਦੱਸਿਆ ਕਿ ਕਤਲ ਕਰਨ ਤੋਂ ਬਾਅਦ ਮੁਲਜ਼ਮ ਸੰਜੇ ਨੇ ਲਾਸ਼ ਨੂੰ ਫਰੀਜ਼ਰ ਵਿੱਚ ਰੱਖਿਆ ਸੀ ਅਤੇ ਤਾਪਮਾਨ ਘੱਟ ਤੋਂ ਘੱਟ ਰੱਖਿਆ ਸੀ ਤਾਂ ਜੋ ਲਾਸ਼ ਵਿੱਚੋਂ ਬਦਬੂ ਨਾ ਆਵੇ। ਇਸ ਤੋਂ ਬਾਅਦ ਉਸ ਨੇ ਕੱਪੜਾ ਬੰਨ੍ਹ ਕੇ ਫਰਿੱਜ 'ਤੇ ਹੋਰ ਸਾਮਾਨ ਰੱਖ ਦਿੱਤਾ। ਲਾਸ਼ ਨੂੰ ਇਸ ਲਈ ਜਮ੍ਹਾ ਕੀਤਾ ਗਿਆ ਸੀ ਤਾਂ ਜੋ ਇਹ ਖਰਾਬ ਨਾ ਹੋ ਜਾਵੇ। ਪੁਲਸ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਦੋਸ਼ੀ ਸੰਜੇ ਨੂੰ ਗ੍ਰਿਫਤਾਰ ਕਰ ਲਿਆ। ਮੁਲਜ਼ਮ ਉਜੈਨ ਜ਼ਿਲ੍ਹੇ ਦੇ ਮੋਲਾਨਾ ਪਿੰਡ ਦਾ ਰਹਿਣ ਵਾਲਾ ਹੈ। ਇਸ ਘਟਨਾ ਨੇ ਇੱਕ ਵਾਰ ਫਿਰ ਸਮਾਜ ਵਿੱਚ ਰਿਸ਼ਤਿਆਂ ਅਤੇ ਅਪਰਾਧਾਂ ਦੀ ਗੰਭੀਰਤਾ ਨੂੰ ਉਜਾਗਰ ਕੀਤਾ ਹੈ।