ਇਸਤਾਂਬੁਲ (ਰਾਘਵ) : ਇੰਡੀਗੋ ਏਅਰਲਾਈਨਜ਼ ਤੋਂ ਦਿੱਲੀ ਅਤੇ ਮੁੰਬਈ ਆਉਣ ਵਾਲੇ ਲਗਭਗ 400 ਯਾਤਰੀ ਇਸਤਾਂਬੁਲ ਹਵਾਈ ਅੱਡੇ 'ਤੇ ਫਸੇ ਹੋਏ ਹਨ। ਰਿਪੋਰਟ ਮੁਤਾਬਕ ਇਹ ਯਾਤਰੀ ਸੰਚਾਲਨ ਸਬੰਧੀ ਸਮੱਸਿਆਵਾਂ ਕਾਰਨ ਇੱਥੇ ਫਸੇ ਹੋਏ ਹਨ। ਏਅਰਪੋਰਟ 'ਤੇ ਫਸੇ ਯਾਤਰੀਆਂ ਨੇ ਸੋਸ਼ਲ ਮੀਡੀਆ 'ਤੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ। ਉਨ੍ਹਾਂ ਦਾ ਦੋਸ਼ ਹੈ ਕਿ ਉਨ੍ਹਾਂ ਨੂੰ ਖਾਣਾ ਨਹੀਂ ਦਿੱਤਾ ਗਿਆ ਅਤੇ ਨਾ ਹੀ ਰਹਿਣ ਲਈ ਜਗ੍ਹਾ ਦਿੱਤੀ ਗਈ। ਕੁਝ ਲੋਕਾਂ ਦੀ ਸਿਹਤ ਵੀ ਵਿਗੜ ਗਈ। ਇਕ ਯਾਤਰੀ ਨੇ ਦੇਰ ਰਾਤ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰਕੇ ਲਿਖਿਆ ਕਿ ਸਾਡੀ ਇਸਤਾਂਬੁਲ ਤੋਂ ਦਿੱਲੀ ਲਈ ਫਲਾਈਟ ਹੈ, ਪਰ ਇੱਥੇ ਏਅਰਪੋਰਟ 'ਤੇ ਕਰੀਬ 400 ਯਾਤਰੀ ਫਸੇ ਹੋਏ ਹਨ। ਜਹਾਜ਼ ਦੀ ਉਡਾਣ ਦਾ ਸਮਾਂ ਰਾਤ 8 ਵਜੇ ਸੀ, ਪਰ ਇਹ 1.30 ਵਜੇ ਤੱਕ ਦੇਰੀ ਨਾਲ ਚੱਲ ਰਿਹਾ ਹੈ। ਇਹ ਕੀ ਬਕਵਾਸ ਹੈ, ਕੀ ਤੁਸੀਂ ਆਪਣੇ ਯਾਤਰੀਆਂ ਨਾਲ ਅਜਿਹਾ ਵਿਵਹਾਰ ਕਰਦੇ ਹੋ?

ਜਹਾਜ਼ ਰਾਹੀਂ ਭਾਰਤ ਆਉਣ ਵਾਲੇ ਇੱਕ ਹੋਰ ਯਾਤਰੀ ਰੋਹਨ ਰਾਜਾ ਨੇ ਦੱਸਿਆ ਕਿ ਸਾਡੀ ਫਲਾਈਟ ਸਵੇਰੇ 6.40 ਵਜੇ ਦਿੱਲੀ ਲਈ ਰਵਾਨਾ ਹੋਣੀ ਸੀ, ਪਰ ਇਹ ਰੱਦ ਹੋ ਗਈ। ਯਾਤਰੀਆਂ ਨੂੰ ਨਾ ਤਾਂ ਠਹਿਰਣ ਲਈ ਜਗ੍ਹਾ ਦਿੱਤੀ ਗਈ ਅਤੇ ਨਾ ਹੀ ਖਾਣਾ, ਉਨ੍ਹਾਂ ਨੂੰ ਠੰਡ ਵਿੱਚ ਛੱਡ ਦਿੱਤਾ ਗਿਆ। ਆਪਣਾ ਗੁੱਸਾ ਜ਼ਾਹਰ ਕਰਦੇ ਹੋਏ ਇਕ ਹੋਰ ਯਾਤਰੀ ਨੇ ਲਿਖਿਆ, ਇੰਡੀਗੋ, ਜਿਸ ਤਰ੍ਹਾਂ ਤੁਸੀਂ ਇਸਤਾਂਬੁਲ ਤੋਂ ਮੁੰਬਈ ਜਾ ਰਹੀ ਫਲਾਈਟ ਨੰਬਰ 6E0018 ਨੂੰ ਹੈਂਡਲ ਕੀਤਾ ਹੈ, ਉਹ ਬਹੁਤ ਡਰਾਉਣਾ ਹੈ। ਇਹ ਰਾਤ 81.5 ਵਜੇ ਰਵਾਨਾ ਹੋਣੀ ਸੀ, ਪਰ ਦੇਰੀ ਨਾਲ 11 ਵਜੇ ਹੋ ਗਈ। ਕੋਈ ਗੱਲ ਨਹੀਂ, ਅਸੀਂ ਇੰਤਜ਼ਾਰ ਕੀਤਾ, ਪਰ ਤੁਸੀਂ ਸਵੇਰੇ 10 ਵਜੇ ਤੱਕ ਦੇਰੀ ਕਰ ਦਿੱਤੀ, ਕੀ ਹੋ ਰਿਹਾ ਹੈ।

ਇਕ ਯਾਤਰੀ ਦੀ ਸ਼ਿਕਾਇਤ 'ਤੇ ਜਵਾਬ ਦਿੰਦੇ ਹੋਏ, ਇੰਡੀਗੋ ਨੇ ਕਿਹਾ ਕਿ ਅਸੀਂ ਤੁਹਾਨੂੰ ਹੋਈ ਅਸੁਵਿਧਾ ਲਈ ਮੁਆਫੀ ਚਾਹੁੰਦੇ ਹਾਂ, ਅਸੀਂ ਜਲਦੀ ਹੀ ਤੁਹਾਡੇ ਨਾਲ ਸੰਪਰਕ ਕਰਾਂਗੇ। ਧਿਆਨ ਯੋਗ ਹੈ ਕਿ ਇਸ ਮਹੀਨੇ ਦੀ ਸ਼ੁਰੂਆਤ 'ਚ ਇੰਡੀਗੋ ਨੂੰ ਦੁਨੀਆ ਦੀ ਸਭ ਤੋਂ ਖਰਾਬ ਏਅਰਲਾਈਨ ਦਾ ਖਿਤਾਬ ਮਿਲਿਆ ਸੀ। 2024 ਏਅਰਹੈਲਪ ਸਕੋਰ ਵਿੱਚ ਇੰਡੀਗੋ ਦੀ ਰੇਟਿੰਗ 4.80 ਸੀ ਅਤੇ ਇਹ ਵਿਸ਼ਵ ਰੈਂਕਿੰਗ ਵਿੱਚ 103ਵੇਂ ਸਥਾਨ 'ਤੇ ਸੀ।