ਸਿਓਲ (ਨੇਹਾ): ਉੱਤਰੀ ਕੋਰੀਆ ਨੇ ਨਵੀਂ ਇੰਟਰਕੌਂਟੀਨੈਂਟਲ ਬੈਲਿਸਟਿਕ ਮਿਜ਼ਾਈਲ ਦੇ ਪ੍ਰੀਖਣ ਦੀ ਪੁਸ਼ਟੀ ਕੀਤੀ ਹੈ। ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ (ਕੇਸੀਐਨਏ) ਨੇ ਦੱਸਿਆ ਕਿ ਇਹ ਪ੍ਰੀਖਣ ਕਿਮ ਜੋਂਗ ਉਨ ਦੇ ਆਦੇਸ਼ 'ਤੇ ਵੀਰਵਾਰ ਨੂੰ ਕੀਤਾ ਗਿਆ ਸੀ। ਕੇਸੀਐਨਏ ਨੇ ਕਿਹਾ ਕਿ ਇਸਦੀ ਉਡਾਣ ਪਹਿਲਾਂ ਪ੍ਰੀਖਣ ਕੀਤੇ ਗਏ ਕਿਸੇ ਵੀ ਮਿਜ਼ਾਈਲ ਨਾਲੋਂ ਉੱਚੀ ਸੀ। ਕੇਸੀਐਨਏ ਮੁਤਾਬਕ ਕਿਮ ਟੈਸਟ ਵਾਲੀ ਥਾਂ 'ਤੇ ਮੌਜੂਦ ਸੀ।

ਨਿਊਜ਼ ਏਜੰਸੀ ਨੇ ਕਿਮ ਦੇ ਹਵਾਲੇ ਨਾਲ ਕਿਹਾ ਕਿ ਇਹ ਪ੍ਰੀਖਣ "ਇੱਕ ਢੁਕਵੀਂ ਫੌਜੀ ਕਾਰਵਾਈ" ਸੀ ਜੋ ਆਪਣੇ ਦੁਸ਼ਮਣਾਂ ਦੀਆਂ ਕਾਰਵਾਈਆਂ ਦਾ ਜਵਾਬ ਦੇਣ ਲਈ ਉੱਤਰੀ ਕੋਰੀਆ ਦੇ ਦ੍ਰਿੜ ਇਰਾਦੇ ਨੂੰ ਦਰਸਾਉਂਦੀ ਹੈ। ਇੱਕ ਦਿਨ ਪਹਿਲਾਂ, ਦੱਖਣੀ ਕੋਰੀਆ ਦੀ ਫੌਜੀ ਖੁਫੀਆ ਏਜੰਸੀ ਨੇ ਸੰਸਦ ਮੈਂਬਰਾਂ ਨੂੰ ਦੱਸਿਆ ਸੀ ਕਿ ਉੱਤਰੀ ਕੋਰੀਆ ਨੇ ਆਪਣੇ ਸੱਤਵੇਂ ਪਰਮਾਣੂ ਪ੍ਰੀਖਣ ਦੀਆਂ ਤਿਆਰੀਆਂ ਪੂਰੀਆਂ ਕਰ ਲਈਆਂ ਹਨ ਅਤੇ ਅਮਰੀਕਾ ਤੱਕ ਪਹੁੰਚਣ ਦੇ ਸਮਰੱਥ ਇੱਕ ਲੰਬੀ ਦੂਰੀ ਦੀ ਮਿਜ਼ਾਈਲ ਦਾ ਪ੍ਰੀਖਣ ਕਰਨ ਦੇ ਨੇੜੇ ਹੈ।