ਪੱਤਰ ਪ੍ਰੇਰਕ : ਸੀਜ਼ਨ ਦੇ ਸਭ ਤੋਂ ਰੋਮਾਂਚਕ ਮੈਚ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਮੁੰਬਈ ਇੰਡੀਅਨਜ਼ ਨੂੰ ਹਰਾਇਆ ਹੈ। ਹਾਰਦਿਕ ਪੰਡਯਾ ਦੀ ਅਗਵਾਈ ਵਾਲੀ ਮੁੰਬਈ ਨੇ ਆਪਣੀ ਖਰਾਬ ਗੇਂਦਬਾਜ਼ੀ ਅਤੇ ਫੀਲਡਿੰਗ ਕਾਰਨ ਨਿਰਾਸ਼ ਕੀਤਾ। ਪਹਿਲਾਂ ਖੇਡਦਿਆਂ ਹੈਦਰਾਬਾਦ ਨੇ ਕਲਾਸੇਨ, ਅਭਿਸ਼ੇਕ ਅਤੇ ਟ੍ਰੈਵਿਸ ਹੈੱਡ ਦੇ ਅਰਧ ਸੈਂਕੜਿਆਂ ਦੀ ਮਦਦ ਨਾਲ 277 ਦੌੜਾਂ ਬਣਾਈਆਂ। ਇਹ ਆਈਪੀਐਲ ਇਤਿਹਾਸ ਵਿੱਚ ਕਿਸੇ ਟੀਮ ਵੱਲੋਂ ਇੱਕ ਪਾਰੀ ਵਿੱਚ ਬਣਾਇਆ ਗਿਆ ਸਭ ਤੋਂ ਵੱਡਾ ਸਕੋਰ ਹੈ। ਜਵਾਬ 'ਚ ਮੁੰਬਈ ਇੰਡੀਅਨਜ਼ ਦੀ ਟੀਮ ਟੀਚੇ ਦਾ ਪਿੱਛਾ ਕਰਦੇ ਹੋਏ 5 ਵਿਕਟਾਂ ਦੇ ਨੁਕਸਾਨ 'ਤੇ 246 ਦੌੜਾਂ ਹੀ ਬਣਾ ਸਕੀ। ਮੁੰਬਈ ਲਈ ਤਿਲਕ ਵਰਮਾ ਨੇ 64 ਦੌੜਾਂ ਅਤੇ ਟਿਮ ਡੇਵਿਡ ਨੇ 42 ਦੌੜਾਂ ਬਣਾਈਆਂ ਪਰ ਇਹ ਟੀਮ ਦੇ ਕੰਮ ਨਹੀਂ ਆਈ ਅਤੇ ਉਸ ਨੂੰ 31 ਦੌੜਾਂ ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।

ਸਨਰਾਈਜ਼ਰਜ਼ ਹੈਦਰਾਬਾਦ: 277/3 (20 ਓਵਰ)

ਟ੍ਰੈਵਿਸ ਹੈੱਡ ਨੇ ਹੈਦਰਾਬਾਦ ਨੂੰ ਸ਼ਾਨਦਾਰ ਸ਼ੁਰੂਆਤ ਦਿੱਤੀ। ਉਸ ਨੇ ਸ਼ੁਰੂਆਤੀ ਓਵਰਾਂ 'ਚ ਹੀ ਗੇਰਾਲਡ, ਮਾਫਾਕਾ ਅਤੇ ਹਾਰਦਿਕ ਦੀਆਂ ਗੇਂਦਾਂ 'ਤੇ ਕਾਫੀ ਚੌਕੇ ਅਤੇ ਛੱਕੇ ਲਗਾਏ। ਟ੍ਰੈਵਿਸ ਨੇ 18 ਗੇਂਦਾਂ ਵਿੱਚ ਅਰਧ ਸੈਂਕੜਾ ਜੜਿਆ ਜੋ ਹੈਦਰਾਬਾਦ ਲਈ ਦੂਜਾ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਸੀ। ਉਸ ਨੇ 24 ਗੇਂਦਾਂ ਵਿੱਚ 9 ਚੌਕਿਆਂ ਅਤੇ ਤਿੰਨ ਛੱਕਿਆਂ ਦੀ ਮਦਦ ਨਾਲ 62 ਦੌੜਾਂ ਬਣਾਈਆਂ। ਮਯੰਕ ਅਗਰਵਾਲ 13 ਗੇਂਦਾਂ ਵਿੱਚ 11 ਦੌੜਾਂ ਬਣਾ ਕੇ ਹਾਰਦਿਕ ਦਾ ਸ਼ਿਕਾਰ ਬਣੇ। ਇਸ ਤੋਂ ਬਾਅਦ ਅਭਿਸ਼ੇਕ ਸ਼ਰਮਾ ਨੇ ਏਡਨ ਮਾਰਕਰਮ ਨਾਲ ਮਿਲ ਕੇ ਹੱਥ ਖੋਲ੍ਹੇ ਅਤੇ 10 ਓਵਰਾਂ ਦੇ ਅੰਦਰ ਹੀ ਸਕੋਰ 130 ਦੇ ਪਾਰ ਪਹੁੰਚ ਗਿਆ। ਅਭਿਸ਼ੇਕ ਤਾਲ ਵਿੱਚ ਨਜ਼ਰ ਆਏ। 16 ਗੇਂਦਾਂ 'ਚ ਆਪਣੇ ਅਰਧ ਸੈਂਕੜੇ ਦੌਰਾਨ ਉਸ ਨੇ ਮੁੰਬਈ ਦੇ ਸਾਰੇ ਗੇਂਦਬਾਜ਼ਾਂ ਨੂੰ ਮਾਤ ਦਿੱਤੀ। ਉਸ ਨੇ 23 ਗੇਂਦਾਂ ਵਿੱਚ ਤਿੰਨ ਚੌਕਿਆਂ ਅਤੇ ਸੱਤ ਛੱਕਿਆਂ ਦੀ ਮਦਦ ਨਾਲ 63 ਦੌੜਾਂ ਬਣਾਈਆਂ। ਇਸ ਤੋਂ ਬਾਅਦ ਹੇਨਰਿਕ ਕਲਾਸੇਨ ਨੇ ਏਡਨ ਮਾਰਕਰਮ ਨਾਲ ਮਿਲ ਕੇ ਸਕੋਰ ਨੂੰ 200 ਤੋਂ ਪਾਰ ਕਰ ਦਿੱਤਾ। ਹੇਨਰਿਚ ਨੇ 34 ਗੇਂਦਾਂ 'ਚ 4 ਚੌਕਿਆਂ ਅਤੇ 7 ਛੱਕਿਆਂ ਦੀ ਮਦਦ ਨਾਲ 80 ਦੌੜਾਂ ਬਣਾਈਆਂ। ਇਸ ਦੇ ਨਾਲ ਹੀ ਏਡਨ ਮਾਰਕਰਮ ਨੇ 28 ਗੇਂਦਾਂ 'ਚ 2 ਚੌਕਿਆਂ ਅਤੇ ਇਕ ਛੱਕੇ ਦੀ ਮਦਦ ਨਾਲ 42 ਦੌੜਾਂ ਬਣਾਈਆਂ ਅਤੇ ਸਕੋਰ ਨੂੰ 277 ਤੱਕ ਪਹੁੰਚਾਇਆ।

ਮੁੰਬਈ ਇੰਡੀਅਨਜ਼: 246-5 (20 ਓਵਰ)

ਵੱਡੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਮੁੰਬਈ ਨੂੰ ਦੋਵੇਂ ਸਲਾਮੀ ਬੱਲੇਬਾਜ਼ ਈਸ਼ਾਨ ਕਿਸ਼ਨ ਅਤੇ ਰੋਹਿਤ ਸ਼ਰਮਾ ਨੇ ਸ਼ਾਨਦਾਰ ਸ਼ੁਰੂਆਤ ਦਿੱਤੀ। ਜਿੱਥੇ ਈਸ਼ਾਨ ਨੇ 13 ਗੇਂਦਾਂ 'ਚ 2 ਚੌਕਿਆਂ ਅਤੇ 4 ਛੱਕਿਆਂ ਦੀ ਮਦਦ ਨਾਲ 34 ਦੌੜਾਂ ਬਣਾਈਆਂ, ਉਥੇ ਹੀ ਰੋਹਿਤ ਸ਼ਰਮਾ ਨੇ 12 ਗੇਂਦਾਂ 'ਚ ਇਕ ਚੌਕੇ ਅਤੇ 3 ਛੱਕਿਆਂ ਦੀ ਮਦਦ ਨਾਲ 26 ਦੌੜਾਂ ਬਣਾਈਆਂ। ਇਨ੍ਹਾਂ ਦੀ ਬਦੌਲਤ ਮੁੰਬਈ ਨੇ ਪਹਿਲੇ ਪੰਜ ਓਵਰਾਂ ਵਿੱਚ ਸਕੋਰ 67/2 ਬਣਾ ਲਿਆ। ਇਸ ਤੋਂ ਬਾਅਦ ਨਮਨ ਧੀਰ 14 ਗੇਂਦਾਂ 'ਚ 2 ਚੌਕਿਆਂ ਅਤੇ 2 ਛੱਕਿਆਂ ਦੀ ਮਦਦ ਨਾਲ 30 ਦੌੜਾਂ ਬਣਾ ਕੇ ਪੈਵੇਲੀਅਨ ਪਰਤ ਗਏ। ਪਰ ਤਿਲਕ ਵਰਮਾ ਨੇ ਕਪਤਾਨ ਹਾਰਦਿਕ ਪੰਡਯਾ ਦੇ ਨਾਲ ਮਿਲ ਕੇ ਹਮਲਾਵਰ ਬੱਲੇਬਾਜ਼ੀ ਜਾਰੀ ਰੱਖੀ ਅਤੇ 13 ਓਵਰਾਂ ਵਿੱਚ ਸਕੋਰ ਨੂੰ 170/3 ਤੱਕ ਪਹੁੰਚਾਇਆ। ਇਸ ਦੌਰਾਨ ਤਿਲਕ 5 ਛੱਕਿਆਂ ਦੀ ਮਦਦ ਨਾਲ ਆਪਣਾ ਅਰਧ ਸੈਂਕੜਾ ਪੂਰਾ ਕਰਨ 'ਚ ਸਫਲ ਰਹੇ। ਤਿਲਕ 34 ਗੇਂਦਾਂ 'ਤੇ 64 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਹਾਰਦਿਕ ਦੀ ਹੌਲੀ ਪਾਰੀ ਟੀਮ ਨੂੰ ਭਾਰੀ ਪਈ। ਉਸ ਨੇ 20 ਗੇਂਦਾਂ ਵਿੱਚ 24 ਦੌੜਾਂ ਬਣਾਈਆਂ। ਹਾਲਾਂਕਿ ਟਿਮ ਡੇਵਿਡ ਨੇ ਇੱਕ ਸਿਰਾ ਸੰਭਾਲਿਆ ਅਤੇ 200 ਦੀ ਸਟ੍ਰਾਈਕ ਰੇਟ ਨਾਲ ਦੌੜਾਂ ਬਣਾਈਆਂ ਪਰ ਟੀਚਾ ਬਹੁਤ ਦੂਰ ਰਿਹਾ। ਟਿਮ ਡੇਵਿਡ ਨੇ 22 ਗੇਂਦਾਂ 'ਚ 3 ਛੱਕਿਆਂ ਦੀ ਮਦਦ ਨਾਲ 42 ਦੌੜਾਂ ਬਣਾਈਆਂ।