ਸ਼ਾਹਪੁਰ (ਸਰਬ) : ਸ਼ਾਹਕੋਟ ਥਾਣੇ ਦੀ ਹਾਈਟੈਕ ਚੌਕੀ ਤੋਂ ਕੁਝ ਕਦਮ ਦੂਰ ਸਤਲੁਜ ਦਰਿਆ 'ਤੇ ਰਾਤ ਦੇ ਹਨੇਰੇ 'ਚ ਹੋ ਰਹੀ ਨਾਜਾਇਜ਼ ਮਾਈਨਿੰਗ ਦੀ ਜਾਂਚ ਕਰਨ ਆਏ ਜ਼ਿਲਾ ਮਾਈਨਿੰਗ ਅਫਸਰ ਫਰੀਦਕੋਟ ਸਮੇਤ 10 ਅਧਿਕਾਰੀਆਂ 'ਤੇ ਅਣਪਛਾਤੇ ਹਮਲਾਵਰਾਂ ਨੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤ।

ਇਸ ਹਮਲੇ ਵਿੱਚ ਅਧਿਕਾਰੀਆਂ ਦੀਆਂ ਗੱਡੀਆਂ ਦੀ ਭੰਨਤੋੜ ਕਰਨ ਤੋਂ ਇਲਾਵਾ ਹਮਲਾਵਰਾਂ ਨੇ ਗੱਡੀ ਵਿੱਚੋਂ ਇੱਕ ਲੈਪਟਾਪ, ਨਕਦੀ, 2 ਪਰਸ ਅਤੇ ਹੋਰ ਸਾਮਾਨ ਵੀ ਚੋਰੀ ਕਰ ਲਿਆ। ਫਲਾਇੰਗ ਟੀਮ ਦੇ ਗੰਨਮੈਨ ਵੱਲੋਂ ਹਵਾ ਵਿੱਚ ਗੋਲੀ ਚਲਾ ਕੇ ਅਧਿਕਾਰੀਆਂ ਦੀ ਜਾਨ ਬਚਾਈ ਗਈ। ਜ਼ਿਲ੍ਹਾ ਮਾਈਨਿੰਗ ਅਫ਼ਸਰ ਫ਼ਰੀਦਕੋਟ ਜਗਸੀਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਨੇ ਸ਼ਾਹਕੋਟ ਦੇ ਨਾਲ ਲੱਗਦੇ ਸਤਲੁਜ ਦਰਿਆ ਦੇ ਖੇਤਰ ਵਿੱਚ ਰਾਤ ਸਮੇਂ ਅਚਨਚੇਤ ਚੈਕਿੰਗ ਕੀਤੀ। ਉਸ ਨੇ ਦੇਖਿਆ ਕਿ ਰੇਤ 2 ਟਰਾਲੀਆਂ ਵਿੱਚ ਲੱਦਾਈ ਜਾ ਰਹੀ ਸੀ।

ਉਨ੍ਹਾਂ ਦੀ ਟੀਮ ਨੂੰ ਦੇਖ ਕੇ ਰੇਤ ਭਰਨ ਵਾਲੇ ਲੋਕ ਲੁਕ ਗਏ ਅਤੇ ਕੁਝ ਦੇਰ ਬਾਅਦ 30-35 ਅਣਪਛਾਤੇ ਹਮਲਾਵਰ ਤੇਜ਼ਧਾਰ ਹਥਿਆਰਾਂ ਨਾਲ ਲੈਸ ਹੋ ਕੇ ਆ ਗਏ ਅਤੇ ਉਨ੍ਹਾਂ ਦੇ ਵਾਹਨਾਂ ਦੀ ਭੰਨਤੋੜ ਕਰਨੀ ਸ਼ੁਰੂ ਕਰ ਦਿੱਤੀ। ਇਸ ਦੌਰਾਨ ਉਨ੍ਹਾਂ ਦੇ ਗੰਨਮੈਨ ਨੇ ਹਵਾ ਵਿੱਚ ਗੋਲੀ ਚਲਾ ਕੇ ਅਧਿਕਾਰੀਆਂ ਦੀ ਜਾਨ ਬਚਾਈ।

ਉਸ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਨੇ ਕੁਝ ਦੂਰੀ 'ਤੇ ਸਥਿਤ ਥਾਣਾ ਸ਼ਾਹਕੋਟ ਦੀ ਹਾਈਟੈਕ ਚੌਕੀ 'ਤੇ ਜਾ ਕੇ ਪੁਲਸ ਦੀ ਸ਼ਰਨ ਲਈ। ਉਨ੍ਹਾਂ ਦੱਸਿਆ ਕਿ ਉਕਤ ਵਿਅਕਤੀਆਂ ਨੇ ਸਰਕਾਰੀ ਬੋਲੈਰੋ ਅਤੇ ਕ੍ਰੇਟਾ ਗੱਡੀਆਂ ਦੀ ਭੰਨਤੋੜ ਕੀਤੀ ਹੈ। ਅਣਪਛਾਤੇ ਵਿਅਕਤੀਆਂ ਨੇ ਲਲਕਾਰਿਆ ਅਤੇ ਰੇਤ ਨਾਲ ਭਰੇ ਟਰੈਕਟਰ ਅਤੇ ਟਰਾਲੀਆਂ ਲੈ ਕੇ ਭੱਜ ਗਏ। ਉਹ ਦੂਸਰੀ ਟਰਾਲੀ ਛੱਡ ਕੇ ਚਲੇ ਗਏ ਪਰ ਟਰੈਕਟਰ ਭਜਾਉਣ ਵਿੱਚ ਸਫਲ ਹੋ ਗਏ।

ਦੱਸ ਦੇਈਏ ਕਿ ਥਾਣਾ ਸ਼ਾਹਕੋਟ ਦੀ ਪੁਲਿਸ ਨੇ ਜ਼ਿਲ੍ਹਾ ਮਾਈਨਿੰਗ ਅਫ਼ਸਰ ਫ਼ਰੀਦਕੋਟ ਜਗਸੀਰ ਸਿੰਘ ਦੇ ਬਿਆਨਾਂ ਦੇ ਆਧਾਰ 'ਤੇ ਉਪਰੋਕਤ ਅਣਪਛਾਤੇ 30-35 ਹਮਲਾਵਰਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ।