ਬਾਰਾਬੰਕੀ (ਸਰਬ) : ਨੌਕਰੀ ਲਈ ਵਿਦੇਸ਼ ਗਏ ਉੱਤਰ ਪ੍ਰਦੇਸ਼ ਦੇ 3 ਇੰਜੀਨੀਅਰ ਨੌਜਵਾਨਾਂ ਨੂੰ ਬੰਧਕ ਬਣਾ ਲਿਆ ਗਿਆ ਹੈ। ਨੌਜਵਾਨਾਂ ਦਾ ਇਲਜ਼ਾਮ ਹੈ ਕਿ ਚਾਈਨੀਜ਼ ਕੰਪਨੀ ਸਕੀਮਿੰਗ ਕਰ 18 ਤੋਂ 20 ਘੰਟੇ ਤੱਕ ਸਾਈਬਰ ਧੋਖਾਧੜੀ ਨਾਲ ਸਬੰਧਤ ਕੰਮ ਕਰਵਾਇਆ ਜਾ ਰਿਹਾ ਹੈ। ਕੰਮ ਕਰਨ ਤੋਂ ਮਨ੍ਹਾਂ ਕਰਨ 'ਤੇ ਸਾਡੇ ਕੁੱਟਮਾਰ ਕਰ ਬਿਜਲੀ ਦੇ ਝਟਕੇ ਦੇ ਕੇ ਤੰਗ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਬਾਰਾਬੰਕੀ ਦੇ ਰਹਿਣ ਵਾਲੇ ਇੱਕ ਨੌਜਵਾਨਅਤੇ ਉਸ ਦੇ 2 ਦੋਸਤਾਂ ਨੇ ਮਿਆਂਮਾਰ ਤੋਂ ਇੱਕ ਵੀਡੀਓ ਜਾਰੀ ਕਰਕੇ ਪ੍ਰਧਾਨ ਮੰਤਰੀ ਮੋਦੀ ਅਤੇ ਯੂਪੀ ਦੇ ਮੁੱਖ ਮੰਤਰੀ ਯੋਗੀ ਨੂੰ ਮਿਆਂਮਾਰ ਸਥਿਤ ਚਾਈਨੀਜ਼ ਕੰਪਨੀ ਦੀ ਕੈਦ ਤੋਂ ਛਡਵਾਉਣ ਦੀ ਬੇਨਤੀ ਕੀਤੀ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਉੱਤਰ ਪ੍ਰਦੇਸ਼ ਦੀ ਰਾਜਧਾਨੀ ਲਖਨਊ ਅਤੇ ਬਾਰਾਬੰਕੀ ਦੇ ਰਹਿਣ ਵਾਲੇ ਤਿੰਨ ਇੰਜੀਨੀਅਰ ਦੋਸਤ ਵਿਦੇਸ਼ ਵਿੱਚ ਨੌਕਰੀ ਦੇ ਨਾਂ 'ਤੇ ਮਨੁੱਖੀ ਤਸਕਰੀ ਦਾ ਸ਼ਿਕਾਰ ਹੋ ਗਏ। ਦਰਅਸਲ, ਬਾਰਾਬੰਕੀ ਜ਼ਿਲੇ ਦੇ ਜ਼ੈਦਪੁਰ ਥਾਣਾ ਖੇਤਰ ਦੇ ਅਮਰਨਾਥ ਨੇ ਨੌਕਰੀ ਲਈ ਵਿਦੇਸ਼ ਗਏ ਆਪਣੇ ਬੇਟੇ ਨੂੰ ਬੰਧਕ ਬਣਾਉਣ ਦਾ ਦੋਸ਼ ਲਗਾਇਆ ਹੈ। ਪਿਤਾ ਨੇ ਦੱਸਿਆ ਕਿ ਪੁੱਤਰ ਅਜੈ ਕੁਮਾਰ 26 ਮਾਰਚ 2024 ਨੂੰ ਆਪਣੇ ਦੋਸਤਾਂ ਸਾਗਰ ਚੌਹਾਨ, ਰਾਹੁਲ ਉਰਫ਼ ਆਰੁਸ਼ ਗੌਤਮ ਨਾਲ ਨੌਕਰੀ ਲਈ ਮਲੇਸ਼ੀਆ ਗਿਆ ਸੀ ਪਰ ਉੱਥੇ ਪਹੁੰਚਣ ਦੀ ਬਜਾਏ ਉਸ ਨੂੰ ਮਿਆਂਮਾਰ ਭੇਜ ਦਿੱਤਾ ਗਿਆ।

ਪਿਤਾ ਅਮਰਨਾਥ ਨੇ ਦੱਸਿਆ ਕਿ ਤਿੰਨਾਂ ਨੂੰ ਮਿਆਂਮਾਰ 'ਚ ਧੋਖੇ ਨਾਲ ਬੰਧਕ ਬਣਾਇਆ ਗਿਆ ਹੈ। ਮੇਰਾ ਬੇਟਾ ਅਤੇ ਉਸਦੇ ਦੋਸਤ ਉੱਥੇ ਬਹੁਤ ਪਰੇਸ਼ਾਨ ਹਨ, ਪਰਿਵਾਰ ਵਾਲੇ ਵੀ ਬਹੁਤ ਪਰੇਸ਼ਾਨ ਹਨ। ਅਜੈ ਦੇ ਪਿਤਾ ਅਮਰਨਾਥ ਨੇ ਪ੍ਰਧਾਨ ਮੰਤਰੀ ਮੋਦੀ ਅਤੇ ਯੂਪੀ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਤੋਂ ਆਪਣੇ ਪੁੱਤਰ ਅਤੇ ਉਸਦੇ ਦੋਸਤਾਂ ਨੂੰ ਸੁਰੱਖਿਅਤ ਭਾਰਤ ਲਿਆਉਣ ਲਈ ਮਦਦ ਦੀ ਮੰਗ ਕੀਤੀ ਹੈ।